Honorius, episcopus, servus servorum Dei, venerabilibus fratribus suffraganeis Coloniensis ecclesie et dilectis filiis electo Coloniensi et abbatibus, prioribus, decanis, archidiaconis et aliis ecclesiarum prelatis in Coloniensi provincia constitutis, salutem et apostolicam benedictionem.

Non absque dolore cordis et plurima turbatione didicimus quod ita in plerisque partibus ecclesiastica censura dissolvitur et canonice sententie severitas enervatur, ut viri religiosi et hii maxime qui per Sedis Apostolice privilegia maiori donati sunt libertate, passim a malefactoribus suis iniurias sustineant et rapinas, dum vix invenitur qui congrua illis protectione subveniat et pro fovenda pauperum innocentia se murum defensionis opponat. Specialiter autem dilecti filii abbas et conventus monasterii de Berna, Premonstratensis ordinis, tam de frequentibus iniuriis quam de ipso cotidiano defectu iusticie conquerentes, universitatem vestram litteris petierunt apostolicis excitari, ut ita, videlicet in tribulationibus suis contra malefactores eorum prompta debeatis magnanimitate consurgere, quod ab angustiis quas sustinent et pressuris vestro possint presidio respirare. Ideoque universitati vestre per apostolica scripta mandamus atque precipimus quatenus illos qui possessiones vel res seu domos predictorum monachorum vel hominum suorum irreverenter invaserint aut ea iniuste detinuerint, que predictis monachis ex testamento decedentium relinquuntur, seu in ipsos monachos contra apostolice sedis indulta sententiam excommunicationis aut interdicti presumpserint promulgare vel decimas laborum de possessionibus habitis ante concilium generale seu nutrimentis ipsorum, spretis apostolice sedis privilegiis extorquere, monitione premissa, si layci fuerint publice candelis accensis excommunicationis sententia percellatis; si vero clerici vel canonici regulares seu monachi fuerint, eos appelatione remota ab officio et beneficio suspendatis, neutram relaxaturi sententiam donec predictis monachis plenarie satisfaciant et tam layci quam clerici seculares qui pro violenta manuum iniectione anathematis vinculo fuerint innodati, cum diocesani episcopi litteris ad Sedem Apostolicam venientes ab eodem vinculo mereantur absolvi; villas autem in quibus bona predictorum monachorum vel hominum suorum per violentiam detenta fuerint, quamdiu ibi sunt, interdicti sententie supponatis.

Datum Rome apud Sanctum Petrum, VIII kalendas ianuarii, pontificatus nostri anno primo.