a. Piot, Cartulaire I, 209-210, nr. 175 (gedateerd 10 juli 1242), naar C.

Grauwels, Regestenlijst, [z.p.], nr. 187.

Zie Van Synghel, DONB, nr. 1249.09.20.

Thomas, Dei gratia abbas monasterii Sancti Trudonis, totusque eiusdem loci conventus universis presentes litteras inspecturis salutem in Domino.

Noverint universi quod nos Theoderico, dicto Luef de Berendunc, decimam nostram de Bardewic et capellam cum tanto terre quod facit medietatem carruce, que bona ipsius antecessores ab antiquo tempore tenuerunt, videlicet a domino Rodulfo et eius successoribus nostris abbatibus usque ad nostra tempora, ad pactum contulimus hereditario iure in perpetuum pacifice possidenda, tali conditione quod nobis marcam et dimidiam argenti probabilis ad ecclesiam nostram in die beate Gertrudis persolvet annuatim ipse Theodericus vel quilibet eius successor. Quas si nobis infra octavas eiusdem Virginis non persolverit, extunc ad ipsa bona recursum habemus et sub nostra penitus erunt potestate. De eo vero quod supererit, idem Theodericus et eius heres noster homo beneficiatus existet. Capellam autem que infra terminum illum constructa est sine aliqua nostra sollicitudine aut datione de omnibus que ad eam pertinent, intro et foris ordinabit et ei apud episcopum, archidiaconum et decanum providebit et in ea suis expensis presbiterum ponet. Si tamen ad hoc imposterum devenerit ut eadem capella per se sacerdoti possit sufficere, tunc ipse Theodericus vel eius successor sacerdotem, quem in ea constituere voluerit, abbati nostro presentabit. Quem abbas, si ydoneum esse viderit, admittet. Nullusque de hac decima heres esse poterit, nisi qui ancillam ecclesie nostre duxerit uxorem.

Testes huius rei sunt: Christianus, advocatus de Sancto Trudone, Willelmus, castellanus de Montenacho, Gotscalcus, Iordanus, Adam, Arnoldus Puer, scabini Sancti Trudonis; Reiboldus de Woderic et Rodulfus de Dourea, milites, et Thodericusb, filius Iacobi de Dovre, et alii quamplures.

Et ut hoc ratum permaneat, presentem paginam sigillis nostris fecimus roborari.

Actum et datum apud Sanctum Trudonem, anno Domini M^o CC^o X^oLII^​o, feria V^a infra octavas apostolorum Petri et Pauli.