De omschrijving dat eigenheit van Rode heeft betrekking op het grondgebied van Venray, zie M. Flokstra, Beknopte geschiedenis van het gebied tot 1798. Historische Studiegroep “Land van Kessel”, zie http://landvankessel.nl/korte%20geschiedenis.htm.

Wi Ian, here van Kuyc, maken cunt alle diengenen die dese litteren sien of horen ende orconden dat wi gelovet hebben vor unsen here Ian, van der Godes genaden hertoge van Lothrigge ende van Brabant, ende vor alle sin hulpere ende sine vrint ende vor ons ende vor unse hulpere ende vor unse vrint dat men en geenrehande scade sal doen, noch mit rove, noch mit brande, noch in geenre maniren van des hertogen wegen, noch van unser wegen in dat lant van Kessele en dat daerto behoort, noch in dat eigenheit van Rode, dat des greven van Gelren is ende dat dar to behoort. Voort hebbe wi gelovet dat men en geenrehande scade sal doen van des hertogen wege van Brabant die hiervore genomet is, noch van unser wegen, dor dat lant van Kuyc over die Mase in des greven lant van Gelren, sunder allene unse stat ten Graue utgesat, also dat wi, here van Kuyc, mit unsen knapen ende mit unsen vrinden wel scade mogen doen dor den Grave ende ut dien Grave openbare over die Mase in des greven lant van Gelren of wi willen ende of wi mogen, behaudenlike al unser vorwarden. Voort moge wi, here van Kuyc, mit unsen knapen ende mit unsen vrinden wel varen helpen en dinen dien hertoge van Brabant die hiervor genomet is anderswaer dar his te done hevet, in dier maniren dat die greve van Gelren noch sin hulpere noch sine vrint dor dat lant van Kessele, noch dor dat eigenheit van Rode, noch dor dat lant van Kuc in des hertogen lant van Brabant die hirvore genomet is, en geenrehande scade en solen doen, noch up uns noch up unse vrint. Voort solen alle diegene die in dat lant van Kessele ende in dat eigenheit van Rode ende in dat lant van Kuyc geseten sin, gansen vrede hebben ende ellic up dat sine, sunder eniger lande argelist, in dier maniren so wanere die hertoge van Brabant die hiervore genomet is deser vorwarden nit langer loven en woude, so moge wi dese vorwarde untseggen vier dage te voren tot Kessele. Voort is dat hir in gesproken in desen selver vorwarden dat die greve van Gelren, noch sin hulpere, noch sine vrint, en geenrehande scade en solen doen in dat lant van Kuyc buten dien Graue, noch mit rove, noch mit brande, noch mit voderigge, noch in geenrehande maniren, noch up uns, noch up unse hulpere, noch up unse vrint die geseten sin tusschen dien Graue ende Kessele.

Dese litteren hebbe wi geven ende besegelt in orcunde mit unsen segele int iaer ons Heren tuelfhundert ende sessentachtentich up Allegotsheiligenavendea.