Nousa Iehans, par le grace Diu de Lothier et de Brabant, faisons a savoir a tous ke comme de des contens, des debas et des guerres ki sont et ont estei entre nous, nos aidans et nos alloies dune part et tres noble homme Renaut, conte de Gelre, ses aidans et ses allois dautre part, en locoison du duchanie de Lembourch, soions mis pour bien de pais en reverent pere, mon segneur Guillaume, par le grace Diu eveske de Cambrai, nostre chier cousin, de haut et de bas, en maniere et en fourme ki sensuit, cest a savoir ke li dis reverens peres peut entre nous sur tous les debas devantdis ordeneir et dire kan ke bon li sanlera, soit a une fois u a pluseurs, par lui u par autres, les queils il metera et nommera en son liu, et aront cil ke il i metera pooir de dire et dordeneir sur les debas devantdis, solonc le pooir ke ^.. l’eveskes devantdis leur donra, comme a ce nous les parties devantdites nos soiens acordei, ke il ensi faire le puist et ce ke li dis eveskes ara dit par devant entre nous, demora ferme et estaule, et du remanent cil k’il ara mis en son liu poront prononcier, ordeneir et dire et aleir avant, solonc ce ke chargie leur sera. Cest dit et ceste ordenance, teile ke dite et ordenee sera soit par ^.. l’eveske devantdit u par autres, ke il metera en son liu, en teil point ke dit est entre nous, avons nous enconvent, nous Iehans, dus devantdis, a tenir bien et loament, sans iamais venir encontre et sur paine de cent mil livres Parisis, prometons a faire che ke li dis ^.. eveskes u cil ke il metera en son liu dira u diront ke nous et li nostre aidant et notre alloiet deverons faire a conte devantdit et a se partie en keil maniere ke ce soit sur le dite paine, la queile paine nous seriens tenut de rendre et renderiens au devantdit conte s’il avenist chose, ke nous alissiens encontre. Et ia soit ce chose, ke li paine fust meffaite de par nous et paie, pour ce ne demoroit mie, ke li dis ne fust tenus fermes et estaules a tous iours. Et pour plus grant segurteit de ces choses devantdites a wardeir et a tenir, nous avons mis pleges et rendeurs pour nous haus hommes, nostres chiers cousins mon segneur Phelippe dArtois, mon segneur Hue de Saint Poul, Iehan, conte de Drewes, Godefroi, nostre frere, Rasse, segneur de Lyedekerke, Oston, segneur de Trasegnies, Iehan, segneur de Kuc, Ernout, segneur de Walehain, Robert, segneur dAske, Gerart, segneur de Roceleir, et Henri de Mourseke, chevaliers. Et nous, li plege devantdit, sil avenist ke ^.. li dus devantdis meffeist la paine solonc le forme desus dite et fust en defaute de paier le, nous tout ensanle et cascuns de nous pour le tout, par ensi ke li uns de nous ne se peust escuseir par l’aiwe k’il doit avoir de l’autre, faisons nostre propre dette de la paine et avons enconvent la paine a rendre et a paier au conte devantdit, et de cele paine a paier obligons nous, nous et le nostre envers tous segneurs, et volons et leur prions ke il nous et cecun de nous destrangnent a ce en tout et en partie par nous et par le nostre saisir et prendre u kil seroit trouveit sans nous apeleir, se nous estiens en defaute, et volons ke cil de nous ki a ceste lettre aront leur saeaus pendus, soient obligie entirement ausi comme se tout i eussent leur saeaus pendus ki nommei sont en ceste lettre. Et est a savoir ke quant li dis sera dis et prononcies et quant nous ^.. dus devantdis arons fait et acompli ce ke engoint nous sera .. par .. l’eveske u par ceaus k’il metera en son liu, solonc le fourme devantdite, nous plege serons quitte de toutes obligances devantdites, mais nous dus devantdis sommes tenu de wardeir a tous iours le dit et l’ordenance devantdite ferme et estaule.

En tesmongnage de veriteit et pour ce ke ces choses soient fermes a tous iours, nous Iehans, dus devantdis, avons a ces presentes lettres pendu nostre sael avec le sael nobles homes et honestes, les pleges deseurdis. Et nous, Philippes dArtois, Hues de Saint Poul, Iehans, cuens de Drewes, Godefrois de Brabant, sires dArscot et de Virson, Rasses, sires de Lyedekerke, Ostes, sires de Trasegnies, Iehans, sires de Kuc, Ernous, sires de Walehain, Robers, sires dAske, Gerars, sires de Roceleir, et Henri de Mourseke, chevalier, plege devantdit, avons a le pruere et a le requeste de noble prince, le duc devantdit, pendus nos saeus avec le sien a ces presentes lettres, ki furent faites en lan de le incarnation nostre Segneur mil CC quatrevins et wit, le veile de le Toussainsb.