nr. 1292.09.22

Origineel

Afschrift

Uitgave

a. Willems, Chronique, 562-563, nr. 199, naar een afschrift in een cartularium van de stad Brussel.

Regesten

Verkooren, Inventaire des chartes II, 184. – Regesta imperii VI, nr. 91 (geraadpleegd 25 juni 2011).

Samenhang

In de onderhavige oorkonde wordt verwezen naar een oorkonde van rooms-koning Rudolf, waarin hij aan de hertog van Brabant inkomsten ter waarde van 3000 mark ter beschikking stelt d.d. 17 februari 1283, zie Regesta imperii VI, nr. 1764 (geraadpleegd 25 juni 2011).

Adolphus, Dei gracia Romanorum rex, semper augustus, universis imperii fidelibus tam presentibus quam futuris graciam suam et omne bonum.

Cum illustris princeps noster et imperii Iohannes, Lotharingie, Brabantie et Lymburgie dux, zelo devotionis et puritate fidei quibus erga nos et Sacrum Romanum Imperium choruscat illibata ipsius sinceritas, initatusa pro liberatione munitionum et bonorum eiusdem Imperii, que alias vix poterant liberari, nobis et per nos ipsi Imperio sedecim milia marcarum denariorum Coloniensium legalium et bonorum liberaliter duxit mutuandum in eiusdem utilitatem Imperii, ut predicitur, convertendas, de quibus nobis et eidem Imperio promisit satisfacere et satisfaciet usque ad Epyphanie Domini festum proximo affuturum cum pagamento quod tempore ipso curret, hoc condicto quod qualecumque pagamentum nobis fecerit dux predictus, tale sibi tenemur facere vice versa vel restituere eiusdem pagamenti valorem ut idem dux et heredes ipsius ex hac parte conserventur indempnes et ne unde meruerunt premium cogantur dispendium reportare. Nos nostro nomine et Imperii, teloneum castri nostri Werdensis cum ipsius castri redditibus, proventibus universis que ipsis pertinenciis eidem duci vel heredibus ipsius assignamus et deputamus tenendum, habendum et possidendum pacifice et quiete donec deductis et defalcatis quingentis marcis annuatim, quas ipse dux vel heredes ipsius pro eiusdem castri ministrabunt expensis de residuo et de aliis proventibus, redditibus et obventionibus quos et quas ipsis similiter assignamus et deputamus, ut infra inmediate patebit, prefatam mutuatam pecuniam recolligant et deducant. Nos siquidem ut idem dux vel heredes sui prefatam pecuniam celerius recolligere valeant et habere, omnes redditus, proventus et obventiones quos et quas nos et Imperium habemus in civitate Aquensi apud Sinseke, in Cremonia et in Duseborch necnon omnes redditus, proventus et obventiones munitionum villarum et bonorum quorumcumque imperialium, quos et quas nos et Imperium inter fluvium Moselle et partes maritinas, que dicuntur der zee, habemus ad presens et iustis modis ac titulis recuperari poterunt usque ad integram refusionem pecunie memorate sive redditus, proventus et obventiones huiusmodi consistant in aquis vel in terris, predicto duci et heredibus suis assignamus et deputamus ad habendum, tenendum, utendum, fruendum et possidendum similiter sine molestia et pressura. Ita sane quod percepta ex eis extenuare debebunt pro rata quantitatis quam percipi contigerit ex eisdem debitum sedecim milium marcarum suprascriptum. Sic videlicet quod postquam prefata sedecim milia marcarum, mediante computatione iusta et rationabili et insuper tria milia marcarum super quibus per litteras domini Rudolphi, Romanorum regis, predecessoris nostri, munitus est, dux predictus fuerint recollecta in teloneo, proventibus, redditibus et obventionibus prelibatis, extunc ipsum theloneum, proventus, obventiones et redditus prelibata ad nos et Imperium libere revertentur. Hoc etiam est adiectum quod si predictus dux pro mutuatione quinque milium marcarum de predicta pecunia acquirendarum sub usuris consuetis custus fecerit et dampna sustinuerint, ipsos custus et dampna recipiet et recuperabit in theloneo, proventibus, obventionibus et redditibus antedictis. Medio autem tempore nobilis vir Castro de Grifenstein, fidelis noster dilectus, castrum Werde predictum ex commissione nostra tanquam officiatus noster et Imperii gubernabit, illlud que ipsi duci vel heredibus suis patefaciet ad intrandum et egrediendum ut tam suam quam Imperii utilitatem prosequi valeant de eodem. Provisurus nichilominus ne ipse dux vel heredes sui in prefatis teloneo, redditibus et proventibus ac pertinenciis castri ipsius impedimentum aliquod patiantur. Quod si interim decederet Castro predictus, unum ex hiis quatuor, videlicet nobilium virorum Euerardum, comitem de Katzenellemboghen, avunculum nostrum, Euerardum, comitem de Marcka, consanguineum nostrum, Iohannem de Kuyc, affinem nostrum, vel Lodeuicum, vicedominum Runkowie, quem ex ipsis maluerimus sub prescriptis modis et conditionibus, tenebimur subrogare. Preterea qui prescripta mutuata pecunia in necessitates Imperii utiliter convertetur, dictus Castro de mandato nostro prestitit et alius vel alii, qui in dicto castro Werde loco ipsius Castronis fuerint subrogati, corporale prestare iuramentum debebunt; quod si de nobis humanitatis acciderit ipse Castro subrogatus vel subrogati ad utilitatem ducis predicti vel heredum suorum que premissa sunt de ipso castro, fideliter exequentur, in tenendo et patefaciendo illud et ne impedimentum in teloneo et ipsius castri proventibus et redditibus sustineant providendo.

In cuius rei testimonium et evidenciam pleniorem presentes litteras fieri fecimus et maiestatis nostre sigilli munime roborari.

Datum Colonie, anno Domini millesimo CC^o nonagesimo secundo, X kalendas octobris, indictione V, regni vero nostri anno primo.

Namen