Nosa capitulum sancti Petri Traiectensis presenti scripto recognoscimus et protestamur quod Iohannes, primogenitus et heres quondam domini Johannis de Dussen, militis, conservator presentium, a nobis et ab ecclesia nostra bona inferius annotata sub certa pensione annua recepit et tenet, videlicet decimam spectantem ad preposituram ecclesie nostre, sitam secus fluvium qui dicitur Alme, solvens inde annuatim pensionem unius marce, hoc est viginti septem solidos et sex denarios Traiectenses. Preterea tenet ab ecclesia nostra idem Iohannes totam decimam de polre in eadem parrochia de Harradswerde, de qua solvet annuatim marcam et dimidiam, viginti septem solidis pro marca computatis et sex denariis. Tenet etiam idem Iohannes ab ecclesia nostra tres partes decime de polre, qui dicitur Hokinnesse, de quibus solvet tres fertones sub estimatione predicta; de medio etiam polre tota decima ipsius est de ecclesia nostra, de qua etiam solvet sedecim solidos et tres denarios Traiectenses cum polrus ille fuerit aggeratus; terminus autem prefixus ei ad solvendum predicta est festum Nativitatis beati Iohannis Baptiste et ab ipso iuratus est. Si in dicto festo vel infra octo dies proximo subsequentes premissa non solverit, extunc sponte arbitratus est ab episcopo Traiectensi vel suo officiali se sine citatione vel monitione precedenti excommunicari et excommunicatum publice denunciari, donec dicta pensio fuerit integre persoluta. Exhibebit etiam predictos denarios suis expensis apud Traiectum. Post ipsum autem senior filius suus recipiet ab ecclesia nostra bona predicta et dabit in prima receptione pro servicio rumbum unum. Et hoc observabitur de filio in filium et de herede in heredem sub annuo pacto. Est autem decima, iacens secus fluvium qui dicitur Alme, ususfructus Elyzabet, matris Iohannis predicti, que videlicet decima marcam solvet sub annua pensione.

Actum et datum anno Domini M^o CC ^o nonagesimo octavo, in octava sancti Iohannis Baptisteb.