Wy Hedewy, vrouwe van Liedekerke ende van Breda, maken cond ende kenlic allen denghenen die dezen brief zullen zien of horen lezen dat wy wael kennen ende lien dat wy van onser liever zuster ioncvrouwen Aliden, ioncfrouwen van Putte, ontfaen hebben ende houden te lien alsulc goed als wi op ghegoed syn van ons vaders doot ende onzer moeder, dair God die ziel of hebben moet, ende van welken goede die stucken hierna staen ghescreven: dat es die tiende in Vorenzaterweert, dien onze lieve zuster Alyd voirs. voert houdt te leen van enen edelen man, heer van Outhena, die ghedeelt leghet metten Bot van der Eme, ende Wisschaerts tiende, die leghet te Raemsdonc, dien zi houdt van Claise die Voghet, ende die tiende die leghet aen die corte zide van der erve, dien zi hevet van den heren van Sinte Pieters in pachte, ende die tiende die leghet boven Emedamme aen die langhe zide, ende die tiende die leghet aen die langhe zide van der erve tusschen Bloccalsbrugghe ende Emekerke, ghemene mitten Bot van der Eme, ende die tiende die leghet aen die Uutalme van Almonde opwaert ins Bots ambocht van der Eme, welke drie tienden ghenoemt miin lieve zuster voirnoemt houdt van de voirghenoemden heren van Sinte Pieters tUtrecht in denselven pacht ende voert XLVIII merghen lands, die legghen boven Emedamme aen die langhe zide ende VIII pont iaerlics van der bede van den mannen van Strine die buten der heerscap van Strine wonen.

Ende want wy dat lien dat wy dit voirghenoemde goed van onzer liever zuster, ioncvrouwe Aliden, ioncvrouwe van Putte voirnoemt, houden te leen als voirseit is, so hebben wy hoer dezen brief ghegeven dair of te orconde bezeghelt mit onzen zeghele.

Ghegeven int iair ons Heren M CCC ende twee, op Onser Vrouwendach die comt na den oest.