Het gebruik van de paasstijl is verondersteld, zie Van der Gouw, Ring van Putten, 5.

Wi Niclaes, heere van Putte ende van Striene, doen cond allen luden dat wi onsen lieven broedere, haren Simoene, hebben gegeven van ons te houdene ten leen ten Zeeuschen rechte een niewe lant te dikene binnen desen palen, dat is van den utersten van der diicdelve van den ouden lande buten dike aldair diicdelve is, ende dair gheen diicdelve en is van der nederster zetzode, buten een roede aen die noortzide; voirt al des gelikes van der oostdike van Bieruliet int westeynde, voirt dair den niewen diick vergadert an den ouden diick van Vrieslant ant oosteynde; voirt van dien niewen dike al omme ten lande wairt, buten tien roeden lants buten den niewen diick mede te diken an die zuutzide. Ende dit voirs. lant binnen desen voirseiden palen hebben wii gegeven den voirseiden haren Simon, onsen broeder, van ons te houden ter leen als voirseit is ten Zeeuschen rechte. Ende wi soelen hebben van dien voirseiden lande onse rechte bede of schot, dat is te virstaen drie Hollantsche penninge iairlicx van elken gemete. Ende voirt gevielt dat wii soonen gewinnen die ridder worden of dochteren te wiiteliken huwelike ghaven, so soude ons dat lant ende die lude dienen gelike onse anderen ouden lande. Ende die voirseide drie penninge iairlicx sullen wi eersta ter eersten note die in dit lant coomt. Ende die lude die in dit lant wonen ende dat lant sullen ons dienen tonser heervairt geliken onse andere lude ende lande bi belope. Ende die dienst sal eerst beginnen alse drie iair leden siin nadien dat dat lant binnen dike begrepen is. Voirt heb wi gegeven wiib leen als voirseit is binnen dien niewe lande dat derdendeel van der coorntiende ende die visscherye al binnen den niewe lande ende den wint, dat is te virstaen dat dair nieman wintmolen maken of zetten en sal dan hi. Ende hi mach die lude die in dit lant wonen, leden dairt iegens ons niet en gaet. Voirt ist dat hi niewe kercken maket ende sticht in dien niewe lande, die sal hi geven. Voirt ist gesproken dat dit niewe lant ghenen cost doen en sal int oude lant, en ware in openen walen. Voirt oic heb wi orlof gegeven airde ende zoden te nemene in onsen lande, dat lant mede te diken al dairt onse oude lande niet en schadet. Ende hierbuten heb wi den voirseiden haren Simone, onsen broeder, gegeven ten voirseiden leenrechte wintmolen te zetten in Bieruliet.

In orconde des dat voirscreven is, so heb wi den voirseiden haren Simone, onsen broeder, gegeven desen brief, ghesegelt mit onsen zegele.

Gegeven int iair ons Heren M CCC ende vier, des woensdages na Sinte Paulusdage tote Gheeruliet.