Wy Willaem, grave van Henegouwen, van Hollant, van Zelant, ende here van Vryslant maken cont dat de here van Hoesden ene marct heeft gheleid in syn lant op enen dinxdach wekelich, dair wy verstaen dat vele lude comen die groten scade ghedaen hebben ons ende onsen lande ende zonderlange die sculdich syn van sgraven Florans doet, ons liven neven, daer God die siele off hebben moete, dat niet en voeghz dat dair yman wandert van onsen lande noch van onsen vrienden ende wiit oick niet en willen. Wairomme wy onbieden al dienghenen die in onsen lande wonen, also lief alse si onse vrintscap hebben, dat nieman die marcht en soeke ute onsen lande ende verbiedent op ene pine van drien ponden Hollantsche. Ende gebieden onsen baliu van Zuythollant, wi dat hy si, dat hy dienghenen die die marcht soeken, die drie pont Hollantsche offneme also dicke alsi se soeken ende hiit ter wairheiden vint. Ende wy willen dat onse bailiu van Zuythollant dit gebot doe kondigen overal in Zuythollant. Ende omdat elc coman de vryeliicker wanderen mach achter onse lant, zoe gheven wy vaste ende zeker gheleyde alle denghenen die de wekemarcht soeken des manendaghes toet Sente Gherdenberghe ende desandersdaghes daerna te varen, te keren, te verurena ende haere comanscap te doene sonder enighe arresteringhe, uteghenomen dieghene die ute onsen lande om haere mesdaet verbannen ziin ende dieghene de ieghens ons buten vreden syn. Ende dit zal geduren ene maent nadien dat wyt dien komannen wedersegghen.

In orkonde van desen brieve bezeghelt met onzen zeghel.

Ghegheven in die Haghe bi onsen rade, int iaer ons Heren dertienhondert ende zevene, des manendaghes na der Elfdusent Maghededach.