Nosa Iohannes, dominus de Kuyck, notum facimus universis presentes litteras visuris et audituris quod nos omnem communitatem nostram a iurisdictione de Mere superius versus Beke se extendentem, tam in humido quam in sicco, in nostra iurisdictione consistentem, prout huiusmodi communitas villis nostris Zannebeke, Beke et Loen solet et noscitur attinere, dedimus et damus per presentes parrochianis in dictis villis, scilicet Zannebeke, Beke et Loen commorantibus, ab ipsis habendam et perpetue possidendam pro annuo et hereditario censu viginti solidorum denariorum legalium et bonorum, grosso veteri regis Turonensis pro sedecim denariis computato, quemquidem censum ecclesiis predictarum villarum ad luminaria pro salute anime nostre conferimus et legamus, ita quod parrochiani de Zannebeke quindecim solidos sancto Iohanni, patrono ecclesie sue, et parrochiani de Beke cum illis de Loen quinque solidos sancto Laurencio, patrono ecclesie sue, ad luminaria quolibet anno persolvent, hac interveniente condicione quod nos et nostri heredes predictam communitatem vendere vel exponere aut in aliqua parte sui minuere non poterimus nec debemus, promittentes bona fide hec premissa firmiter et inviolabiliter observare, omni dolo et fraude exclusis penitus et remotis.

In cuius rei testimonium sigillum nostrum presentibus duximus apponendum.

Datum apud Dolheim, anno Domini M^o CCC^o octavo, crastino beati Iohannis ante Portam Latinam.