Vorige: 
Jan II, heer van Cuijk, beleent Nicolaas, heer van Putten en Strijen, in recht erfleen met de tienden en goederen in het ambacht van Katendrecht, die Jacob van Mierlaar voorheen van hem in leen hield.
[A]. Niet voorhanden.
B. tweede helft 14e eeuw, Den Haag, Nationaal Archief, toegangsnr. 3.19.43, archief van de heren van Putten en Strijen, inv. nr. 3 (oud nr. 142), register ‘tOude francijnboek B 1303-1353. Putten en Strijen. Cas M, fol. 45v.
Wy Ian, heere van Kuuc, maken cond allen denghenen die dezen brief zullen sien of horen lezen dat wi alle die tiende ende goed, hoe dat si ghelegen siin binnen den ambocht van Catendrecht, die heere Iacob van Mierlair van ons plach te houden, verliet hebben ende verlien enen vermoghenden man, den heere Niclaise van Putte ende van Strine, ende zine nacomelingen, van ons ende van onzen nacomelingen te houden tenen rechten erfleen in dustanigher manieren dat heere Niclaise voirs. dese voirs. tiende ende goed enen waelgheboren man van ons sal doen ontfaen. Ende wairt dat sake dat die waelgheboren man storve, so zoude heer Niclais voirnoemt of zine nacomelingen, wairt dat siins ghebrake, binnen den iare dat wiis him vermaenden of onze nacomelingen, wairt dat ons ghebrake, senden enen anderen waelgheboren man die deze voirs. tiende ende goed van ons ende van onzen nacomelingen ontfangen zal, alzo alst voirs. is ende alzo eweliken voirt, zonder alrande arghelist.
Ende omdat wy willen dat dese voirs. dinghe eweliken vaste bliven ende wael ghehouden van ons ende van onsen nacomelingen, zo hebben wi dezen brief open bezeghelt mit onzen zeghele.
Dit was ghedaen int iair ons Heren als men screef M CCC ende elleve, sdonredages na sinte Martiinsdach in den zomer.
