Vorige: 
Nicolaas en Aleid, heer en vrouwe van Putten en Strijen, wijzen hun dochter Aleid een jaarrente toe van 500 pond Hollands die zij in erfleen zal houden van Beatrix, hun oudste dochter, en bepalen de lossingsvoorwaarden van deze rente. Willem III, graaf van Holland, belooft Aleid in haar rechten te beschermen en bezegelt op verzoek mede.
[A]. Niet voorhanden.
[B]. 6 juni 1325, niet voorhanden, maar bekend uit C, vidimus door Hendrik, abt van Ter Doest, naar [A]. – C. 1328 juli 24 - november 24, Den Haag, Nationaal Archief, toegangsnr. 3.01.01, archief Graven van Holland, inv. nr. 290 (voorheen archief LRK Holland, nr. 7) = register E.L. 6, Suyd-Holland, Amstelland en Waterland, Cas C (klein register Zuid-Holland), fol. 42v-43r, nr. 186, naar [B].
Voor de aanvullingen op dit testament d.d. 20 september 1311, zie Van Synghel, DONB, nr. 1311.09.29b.
Wi Niclays, here van Putthe ende van Striene, ende wi Aliid, vrouwe van Putthe ende van Striene, maken cond allen denghenen die desen brief zullen zien of horen lesen dat wi bi overeendraghene van ons beyden ende bi rade van goiden luden omme die nutscepe, die ruste ende dien pays van onsen kendren die wi nu hebben ende omdat wi willen dat hem elc ghepait houd ende ghenen kiif onderlinghe en hebben na onser beyder doit, soe hebben wise gheghoet ende elc bewiist op ziin goed binnen onsen levene in deser manieren dat hierna ghescreven staet.
In den eirsten soe bewisen wi Niclays, here van Putthe ende van Striene voirseyt, na onse doet Aleyden, onser dochter die wi nu hebben, alle die tiende in Catendrecht die wi coften ieghen heren Iacop van Mirlare voir hondert pond Hollands. Voirt soe bewisen wi hare na onser doet die bede van den Oistambocht ende van den Westambocht van Catendrecht voir viiftich pond Hollands. Voirt soe bewisen wi hare na onser doet alle die tiende die wi hebben binnen der vorsche van Portghale. Voirt hondert pond Hollands, die wilke wi houden van den heren van Sinte Martiins tUtrecht. Voirt soe bewisen wi hare hondert pond Hollands, na onse doet siaers in te nemene van onser ghershure in sinte Iansdaghe middezomer van den eirsten ghelde dat mer of ontfaet, uytghenomen der heren gheld van Onser Vrouwenkerke te Gheruliet. Ende wi Aliid, vrouwe van Putthe ende van Striene voirnoemt, bewisen na onse doet Aleyden, onser dochter voirs., hondert ende vijfticht pond Hollands uyt onser ghershure, iaerlix in te nemene in sinte Pietersdaghe inghaende oeist van den eirsten ghelde dat mer of ontfaet. Ende dit es in summe viifhondert pond Hollands siaers, die wilke viifhondert pond Hollands voirs. Aleyd, onse dochter voirnoemt, houden zal bi willen van onsen beyden vader ende moder voirnoemt van Beatricen, onser oudster dochter die wi nu hebben, te rechten erfliene, soe dat niet an hare besterven en zal moghen, het en ware dat hair van rechter maechscepe ane besturve. Ende waer dat sake dat Beatrice, onse oudste dochter voirs., beghaerde dese voirseyde viifhondert pond siaers of te lossene, soe willen wi Niclays ende Aleyd vornoemt dat soese of lossen mach elc hondert pond om dusent pond, te gheven op enen dach toitter tiid dat sise die viifhondert pond ghehelike ende al gheloest heeft. Ende hierbi so zal Aleyd, onse dochter voirs., vertien van alre antale ende besterfte die hair anbesterven mochte van enighen van ons beyden vader ende moeder voirnoemt.
Ende omdat wi Niclays, here van Putthe ende van Striene, ende wi Aleyd, vrouwe van Putthe ende van Striene voirnoemt, willen dat alle dese voirscreven dinghen ewelike vast ende wel ghehouden bliven, soe hebben wi ghebeden ende bidden onsen welieven ende gherechten here Willem, grave van Henegouwen, van Holland, van Zeeland ende here van Vrieseland, waer dat iement an dit voirghenomede goid anspreken woude ioft Aleyd, onser dochter voirnoemt, enich onrecht daerof doen, dat hi haer ende hair goid voirghenoemt bescermede ende te staden stonde ieghens elken mensche ende zinen zeghel hanghe wille in kennesse van al deser ding an desen ieghenwoerdighen brief.
Ende wi Willem, grave van Henegouwen etc. voirnoemt, om bede wille ons liefs neven Niclays, here van Putthe ende van Striene, ende onser liever nichten Aleyden, vrouwe van Putthe ende van Striene voirghenoemt, soe hebben wi beloeft ende beloven Aleyden, onser liever nichten, ende hare goed voirnoemt te bescermen ende in staden te stane ieghens elken mensche ende hebben in kennessen ende in sekerheden van allen desen dinghen desen brief voir bezeghelt met onsen seghele.
Ende wi Niclays, here van Putthe ende van Striene, ende wi Aleyd, vrouwe van Putthe ende van Striene voirnoemt, al diere ghelike in kennesse van al deser ding metten onsen.
Dit was ghedaen int iaer ons Heren als men screef dusent driehondert ende ellevene, op sinte Michielsdach.
